«Yuventus» klubi «Leypsig» yarim himoyachisi Elif Elmasga qiziqish bildirmoqda, deb yozadi Tuttomercatoweb nashri.
Turin klubi avvalroq «Napoli»da Luchano Spalletti qo‘l ostida to‘p surgan va u bilan birga 2023 yilda Skudettoni (Italiya chempionligini) qo‘lga kiritgan 26 yoshli makedoniyalik futbolchini kuzatishda davom etmoqda.
Elmas Neapol klubini 2024 yilning yanvarida tark etib, 24 million yevro evaziga «RB Leypsig»ga o‘tgan edi. Biroq uning Germaniyadagi faoliyati ko‘ngildagidek kechmadi: makedoniyalik futbolchi ijara asosida ikki bor Italiyaga qaytishga majbur bo‘ldi — dastlab 2024/25 yilgi mavsumning ikkinchi yarmida «Torino»da, o‘tgan mavsumda esa «Napoli» safida harakat qildi.
Yarim himoyaning bir nechta pozisiyasini yopa oladigan va hatto hujum qanotida ham o‘ynashga qodir bo‘lgan ushbu universal xavbek «byankoneri» (turinliklar) uchun yaxshi kuchayish bo‘lishi mumkin. Elmasning «Leypsig» bilan shartnomasi 2028 yilning iyuniga qadar mo‘ljallangan, shu sababli nemis klubi mavsum yakunida nisbatan arzon sotib olish huquqi bilan futbolchini ijaraga berishga rozi bo‘lishi mumkin.
