Avstraliya futbol federasiyasi milliy terma jamoa jahon chempionatini tark etganidan keyin bosh murabbiy Toni Popovichga to‘liq ishonch bildirdi. Jamoa penaltilar seriyasida Misrga imkoniyatni boy berib, 1/16 final bosqichida musobaqadagi ishtirokini yakunladi.
«Bu kampaniya juda muvaffaqiyatli o‘tdi. Popovich terma jamoani qabul qilib olganida, vaziyat oson emas edi. U jamoani turnirga to‘g‘ridan-to‘g‘ri olib chiqdi, shundan so‘ng 11 ta g‘alabadan iborat seriya qayd etildi, shuningdek, u tarkib kengligini oshirishga muvaffaq bo‘ldi. Juda qiyin guruhdan chiqish va jahon chempionatining pley-off bosqichiga yo‘l olish — bu ulkan muvaffaqiyat», — dedi Avstraliya futbol federasiyasi bosh ijroiya direktori Martin Kugeler ESPN nashriga bergan intervyusida.
Popovich o‘z lavozimida faoliyatini davom ettiradi va avstraliyaliklarni 2027 yilda bo‘lib o‘tadigan Osiyo Kubogiga tayyorlaydi. Jamoa ushbu turnirda birinchi va oxirgi marta 11 yil avval g‘olib chiqqan edi.
