Angliya terma jamoasi yarim himoyachisi Jud Bellingem Jahon chempionati–2026 1/8 finali doirasida Meksikaga qarshi kechgan o‘yindagi (3:2) hakamlik ishi borasida fikr bildirishdan o‘zini tiyishni afzal ko‘rdi.
Inglizlar bosh hakamning 54-daqiqada Jarell Kuansaga to‘g‘ridan-to‘g‘ri qizil kartochka ko‘rsatgani, shuningdek, 69-daqiqada Harri Keynning qo‘polligi uchun belgilangan penalti qaroridan qattiq norozi bo‘lishgan edi.
«Men hakam haqida gapirmayman, chunki keyingi uchrashuvda maydonga tushishni xohlayman», — deya Bellingemning referi faoliyati haqidagi savolga bergan javobini keltiradi The Touchline nashri.
Chorak finalda «Uch sherlar» Norvegiya terma jamoasi bilan to‘qnash keladi. Ushbu bahs 12 iyul kuni Toshkent vaqti bilan soat 02:00 da bo‘lib o‘tadi.
