Madridning «Real» klubi hujumchisi Rodrigo Goes o‘z tiklanish jarayoni qanday kechayotgani haqida gapirib berdi. Mart oyida futbolchi o‘ng oyoq oldingi xochsimon payi va tashqi meniski yirtilishi sababli muvaffaqiyatli operasiya qilingan edi. Avvalroq uning safga qaytadigan muddati 10 oyni tashkil qilishi xabar berilgandi.

«Ahvolim yaxshi. To‘g‘risini aytsam, ishlar juda a’lo darajada ketmoqda. Men o‘sishimdan qoniqyapman; kundan-kunga o‘zimni yaxshiroq his qilyapman. Bu juda katta sabr talab qiladigan jarayondir. Shunday kunlar bo‘ladiki, uyg‘onganimda kayfiyatim u qadar yaxshi bo‘lmaydi, ammo shunday kunlar ham bo‘ladiki, hammasi zo‘r — xuddi hozir yugurib, maydonga tushib, o‘ynab keta oladigandek tuyuladi... Sabrli bo‘lish kerak, lekin mening ahvolim yaxshi, men baxtliman.

Bu uch yarim oy ichida ko‘p narsani boshdan kechirishga to‘g‘ri keldi: juda yaxshi kunlar ham bo‘ldi, qattiq og‘riq his qilgan juda yomon kunlar ham. Bu juda og‘ir bo‘ldi, hayotimdagi eng qiyin sinov. Shunday kunlar bo‘ldiki, uyg‘onganimda kuchim qolmagandi, ba’zi kunlarda esa kuchga to‘lib-toshardim. Men ushbu sinovlarning barchasidan o‘tdim va bilamanki, qaytadan maydonga tushish imkoniyati paydo bo‘lganida, ular meni yanada kuchli qiladi», — deya Rodrigoning so‘zlarini «AS» nashri keltiradi.