Braziliya terma jamoasi tarkibida jahon chempioni bo‘lgan Ronaldo, matbuotda uning nomidan Jahon chempionatidan chiqib ketgan milliy jamoa futbolchilari va bosh murabbiy Karlo Anchelottini tanqid qilgan intervyu e’lon qilinganidan so‘ng bayonot berdi.
Sobiq hujumchi JCH 1/8 finali doirasidagi Braziliya — Norvegiya uchrashuvidan keyin hech qanday intervyu bermaganini alohida ta’kidladi.
«Shuni aniqlashtirib o‘tmoqchimanki, Braziliya ishtirokidagi o‘yindan so‘ng men hech qanday intervyu bermadim va birorta ham OAV bilan muloqot qilmadim. Matbuotda tarqatilayotgan barcha bayonotlar — yolg‘on (feyk) xabarlardir», — deb yozdi Ronaldo X ijtimoiy tarmog‘ida.
Eslatib o‘tamiz, braziliyaliklar norvegiyaliklarga 1:2 hisobida imkoniyatni boy berib, turnirni tark etishdi. Neymar esa «pentakampeonlar» safidagi faoliyatini yakunlaganini e’lon qildi.
