Madridning «Atletiko» klubi sobiq futbolchisi Fernandes Gabi murabbiylar shtabi tarkibida jonajon klubiga qaytmoqda, deb xabar beradi Marca nashri.

Manbaning ma’lumotlariga ko‘ra, yangi mavsumdan boshlab Gabi bosh murabbiy Diyego Simeone bilan hamkorlikni davom ettiradi, ammo bu safar uning yordamchisi sifatida faoliyat yuritadi. U jamoada sakkiz yillik faoliyatdan so‘ng klubni tark etayotgan Nelson Vivasning o‘rnini egallaydi.

Gabi «Atletiko» tarbiyalanuvchisi hisoblanadi. U «matraschilar» safida 2004 yildan 2007 yilgacha, so‘ngra 2011 yildan 2018 yilgacha to‘p surgan. Klubdan ketganidan keyin u Qatarning «As-Sadd» jamoasida ikki mavsum o‘ynadi va 2020 yilda futbolchilik faoliyatini o‘sha yerda yakunladi. Keyinchalik u murabbiylik faoliyatini boshlab, «Xetafe»ning yoshlar tarkibida hamda «Saragosa» tizimida ishlashga ulgurdi.