«Qizilqum» jamoasi mavsumning ikkinchi qismiga jiddiy tayyorgarlik ko‘rmoqda va tarkibni ikki yangi legioner bilan boyitib oldi. Navoiyliklar hujum chizig‘ini serbiyalik tajribali hujumchi Luka Ratkovich, yarim himoyani esa o‘tgan mavsum «Dinamo»da harakat qilgan braziliyalik Duglas Maykon bilan kuchaytirdi.

Luka Ratkovich — «Qizilqum» hujumchisi

Serbiyalik 29 yoshli hujumchi faoliyati davomida 200 dan ortiq rasmiy uchrashuvda maydonga tushib, 30 dan ortiq gol muallifiga aylangan. U shuningdek, Serbiya birinchi ligasining eng yaxshi to‘purari bo‘lishga ham muvaffaq bo‘lgan. Ratkovich klub bilan mavsum yakuniga qadar mo‘ljallangan shartnomani imzoladi.

Duglas Maykon «oltin izlovchilar» safiga qo‘shildi

O‘tgan mavsumni Samarqandning «Dinamo» jamoasida o‘tkazgan braziliyalik yarim himoyachi Duglas Maykon ham «Qizilqum» futbolchisiga aylandi. Tomonlar o‘rtasida mavsum oxiriga qadar shartnoma imzolangan.

Eslatib o‘tamiz, Maykon O‘zbekiston Superligasida jami 22 ta uchrashuvda maydonga tushib, bitta gol urgan va O‘zbekiston kubogida ham 3 ta o‘yinda qatnashgan.