«Aston Villa»ning argentinalik darvozaboni Emiliano Martines, agar turinliklar o‘z takliflarini oshirishmasa, «Yuventus»ga o‘tmaydi. Bu haqda insayder Fabrisio Romano xabar bermoqda.
Manbaga ko‘ra, «Aston Villa» 33 yoshli darvozabonni «Yuventus»ga olti-etti million yevro evaziga qo‘yib yubormoqchi emas. «Sherlar» dunyoning eng yaxshi darvozabonlaridan biri hisoblangan Martines uchun ancha yuqori summa talab qilmoqda.
Martines «Aston Villa»da 2020-yildan beri to‘p surib kelmoqda. O‘tgan mavsumda argentinalik darvozabon barcha musobaqalarda 44 ta o‘yin o‘tkazib, 49 ta gol o‘tkazib yubordi va 14 ta o‘yinda o‘z darvozasi daxlsizligini saqlab qoldi.
