Ispaniya terma jamoasi sardori Rodri Fransiyaga qarshi jahon chempionati yarim finalidan kutilmalari bilan o‘rtoqlashdi.
«Fransiya ajoyib hujumkorlik salohiyatiga ega, ammo men ularning himoyasini ham alohida qayd etgan bo‘lardim. Biz o‘yinni o‘zimizga ma’qul uslubda olib borishimiz kerak. O‘tgan yildagidek 5:4 hisobi bilan tugaydigan o‘yinlar juda kam uchraydi va biz bu natija bilan chalg‘ib qolmasligimiz lozim.
Bizni yanada kuchliroq jamoa kutmoqda, ularga qarshi gol urish qiyinroq bo‘ladi. Jahon chempionatlari boshqacha ruhda o‘tadi. Biz o‘yinni ko‘proq nazorat qilishimizga to‘g‘ri keladi. Bu turnirning eng yaxshi jamoalaridan biriga qarshi katta sinov, biz uni intiqlik bilan kutmoqdamiz».
