Испания терма жамоаси сардори Родри Францияга қарши жаҳон чемпионати ярим финалидан кутилмалари билан ўртоқлашди.
«Франция ажойиб ҳужумкорлик салоҳиятига эга, аммо мен уларнинг ҳимоясини ҳам алоҳида қайд этган бўлардим. Биз ўйинни ўзимизга маъқул услубда олиб боришимиз керак. Ўтган йилдагидек 5:4 ҳисоби билан тугайдиган ўйинлар жуда кам учрайди ва биз бу натижа билан чалғиб қолмаслигимиз лозим.
Бизни янада кучлироқ жамоа кутмоқда, уларга қарши гол уриш қийинроқ бўлади. Жаҳон чемпионатлари бошқача руҳда ўтади. Биз ўйинни кўпроқ назорат қилишимизга тўғри келади. Бу турнирнинг энг яхши жамоаларидан бирига қарши катта синов, биз уни интиқлик билан кутмоқдамиз».
