Fransiya terma jamoasi yarim himoyachisi Uorren Zair-Emeri JCH-2026 yarim finali doirasidagi Ispaniyaga qarshi o‘yin oldidan Kilian Mbappening ahamiyati haqida o‘z fikrlarini bildirdi. Uchrashuv bugun (Toshkent vaqti bilan soat 23:59) bo‘lib o‘tadi.
«Mbappening salohiyatini hamma biladi. Kilian – favqulodda futbolchi. U bunday muhim o‘yinlarda o‘zini ko‘rsatishni a’lo darajada biladi va g‘alaba uchun bor kuchini beradi. Eng muhimi – biz yagona jamoamiz. Umumiy sa’y-harakatlar bilan natijaga erishish uchun qo‘limizdan kelgan barcha ishni qilamiz», — dedi Zair-Emeri matbuot anjumanida.
Ushbu bahs g‘olibi finalda Argentina yoki Angliya bilan to‘qnash keladi. Sovrin uchun hal qiluvchi jang 19 iyul kuni bo‘lib o‘tadi.
