Matbuotda markaziy himoyachi Ronald Arauxoning «Barselona»dan ketishi mumkinligi haqida yana gap-so‘zlar ko‘paydi.
Pau Kubarsi, Jerar Martin va Erik Garsiya kataloniyaliklar safida «daxlsiz» deb hisoblanadi, Andreas Kristensen esa yaqinda yangi shartnoma imzoladi. Shu tariqa, Arauxo «ortiqcha» bo‘lib qolishi mumkin, chunki u zaxira o‘yinchisi rolidan norozi bo‘lishi tabiiy. Mundo Deportivo xabariga ko‘ra, agar urugvaylik futbolchi ketishni so‘rasa, «ko‘k-anorranglilar» uning o‘rniga yangi markaziy himoyachi taklif qilishga urinib ko‘rishadi.
Ronald Arauxoning «Barselona» bilan amaldagi shartnomasi 2031 yilning o‘rtalarigacha mo‘ljallangan. Transfermarkt baholashicha, 27 yoshli futbolchining transfer qiymati 20 million yevroni tashkil etadi.
