«Barselona» yarim himoyachisi Mark Kasado klubdan ketish shartini ma’lum qildi. 22 yoshli futbolchi klubda qolishni istashini tan oldi, ammo agar unga ochiqchasiga ketish ko‘rsatmasi berilsa, u sotilishga to‘sqinlik qilmasligini bildirdi.
«Agar «Barselona»da ketishim ma’qulroq deb hisoblashsa, demak shunday bo‘ladi. Men doimo jamoaga, klubga yordam berishni istaganman. Men istaydigan yagona narsa shu — qo‘limdan kelgan barcha ishni qilish. Agar mendan ketishimni so‘rashsa — ketaman», — deya Kasadoning so‘zlarini keltiradi Barca Universal.
Yarim himoyachining «ko‘k-anorranglilar» bilan tuzgan mehnat shartnomasi 2028 yilgacha mo‘ljallangan. Transfermarkt portali ispaniyalik futbolchining bozor qiymatini 18 million yevroga baholamoqda.
