«Tottenxem» yarim himoyachi Lukas Bergvall transferi borasida «Nottingem Forest»dan tushgan birinchi taklifni rad etdi. Shu bilan birga, «o‘rmonchilar»ning qiziqishi saqlanib qolmoqda va tomonlar o‘rtasidagi muzokaralar davom etadi, deya xabar bermoqda The Athletic.

20 yoshli shvesiyalik futbolchi «shporlar»ga shu yozda jamoani tark etish istagida ekanini ma’lum qilgan. «Forest» uni «Manchester Siti»ga o‘tish arafasida turgan Elliot Anderson o‘rniga asosiy maqsad sifatida ko‘rmoqda.

Bergvall 2024 yilda «Yurgorden»dan «Tottenxem»ga o‘tgan va debyut mavsumida jamoaning eng yaxshi o‘yinchisi deb topilgan, shuningdek, klubga Yevropa ligasida g‘olib chiqishga yordam bergandi. Murabbiy Roberto de Dzerbi kelganidan so‘ng, futbolchi asosiy tarkibda kamroq maydonga tusha boshladi.

Yarim himoyachiga boshqa Yevropa klublari, jumladan, «Aston Villa» va «Chelsi» ham qiziqish bildirgan. Bergvall Shvesiya terma jamoasi safida JCH-2026 da to‘rtta o‘yinda maydonga tushgan.