Germaniyalik hujumchi Karim Adeyemi «Barselona»ga o‘tishni yakunlash arafasida. Mundo Deportivo ma’lumotlariga ko‘ra, 24 yoshli futbolchi tibbiy ko‘rikdan muvaffaqiyatli o‘tdi, Kataloniya klubi va Dortmundning «Borussiya»si esa bitimning so‘nggi tafsilotlarini kelishib oldi.

Adeyemi kecha kechqurun Barselonaga yetib keldi va bugun ertalab shahar klinikalaridan birida tibbiy ko‘rikdan o‘tdi. Dastlab shartnomadagi ayrim jihatlar tufayli transferni rasmiylashtirish juma kunigacha cho‘zilishi mumkin edi, biroq klublar kelishmovchiliklarni tezda bartaraf etishga muvaffaq bo‘ldi.

Xabar qilinishicha, «Barselona» futbolchi uchun taxminan 34 million yevro to‘laydi, shundan 26 millioni kafolatlangan to‘lovlar, yana 8 millioni esa bonuslar sifatida nazarda tutilgan.

Adeyemi Entoni Gordondan keyin «Barselona»ning joriy yozdagi ikkinchi yangi futbolchisiga aylanadi. Futbolchining rasmiy taqdimoti keyingi haftaga rejalashtirilgan, transfer haqidagi rasmiy e’lon esa yaqin soatlar ichida kutilmoqda.