Argentina terma jamoasi himoyachisi Valentin Barko 2026 yilgi Jahon chempionati yarimfinalida Angliya yarim himoyachisi Jud Bellingemni ikki marta provokasiya qilgani ma’lum bo‘ldi. Bu haqda Marca nashri xabar berdi.

Manba ma’lumotiga ko‘ra, birinchi holat Enso Fernandes hisobni tenglashtirgan goldan so‘ng yuz bergan. Barko zaxira o‘rindig‘idan yugurib chiqib, golni jamoadoshlari bilan nishonlash o‘rniga Angliya futbolchilari tomon yo‘l olgan.

Qayd etilishicha, himoyachi golni aynan Bellingem qarshisida nishonlab, ingliz futbolchilari oldida ataylab sakrab, ularni mazax qilgandek harakat qilgan.

Ikkinchi provokasiya esa uchrashuv yakunlanganidan keyin sodir bo‘lgan. Xabarga ko‘ra, Barko ispan tilida Bellingemga qarata gapirgan va ingliz futbolchisi bu so‘zlarni tushunmaydi, deb o‘ylagan. Biroq Bellingem aytilgan gapni tushungan va bunga javoban argentinalik futbolchining boshiga kafti bilan urgan.

Avvalroq Jud Bellingem sportchiga xos bo‘lmagan xatti-harakati sabab diskvalifikasiya qilinishi mumkinligi haqida xabarlar tarqalgandi.