Angliya terma jamoasi himoyachisi Jed Spens JCH-2026 doirasidagi 3-o‘rin uchun kechgan bahsda Fransiya ustidan qozonilgan g‘alabadan (6:4) so‘ng turnirni o‘z faoliyati nuqtai nazaridan sarhisob qildi.

"Bu yomon bo‘lmagan debyut turniri bo‘ldi. Angliya uchun 1966 yildan beri eng yaxshi natijani qayd etish men uchun katta sharaf. Albatta, biz istagan natija bu emasdi, lekin ijobiy jihatlar ham bor. Men bu jamoaning bir qismi ekanimdan faxrlanaman.

Men har doim o‘zimga ishonganman va bunday jahon sahnasida o‘z imkoniyatlarimni ko‘rsata olganimdan xursandman. Shu ruhda davom etishga umid qilaman. Argentinadan uchralgan mag‘lubiyatdan keyin xafsalamiz pir bo‘lgani aniq, ammo biz barchasini ortda qoldirib, ishimizga diqqatni qaratishimiz kerak edi. Yigitlarga qoyil qolish kerak, ular buni uddalashdi. Bu jamoaning kuchli xarakterga ega ekanining isbotidir.

Menimcha, butun Jahon chempionati, butun turnir xotiramda abadiy saqlanib qoladi. Bu mening birinchi yirik turnirim. Shunday ekan, ha, bu men uchun katta ne’mat. Bu jamoa bilan birgalikda bunday tajribani boshdan kechirish katta sharaf. Gap faqat bugungi o‘yin haqida ketmayapti: Meksikaga qarshi kechgan kecha ham fantastik edi. Shunday ekan, ha, menda ko‘plab ajoyib xotiralar qoldi", — deya Spensning so‘zlarini keltiradi Tuttomercatoweb.