«Surxon» klubi darvozabon Davron Merganovning sog‘lig‘i yuzasidan rasmiy ma’lumot berdi.
Klub matbuot xizmatining xabar qilishicha, Superliganing 12-turi doirasida o‘tgan «Andijon»ga qarshi uchrashuvning 5-daqiqasida bosh qismidan jarohat olgan posbon tibbiy ko‘rikdan o‘tkazilgan. Tekshiruvlar natijasida futbolchida miya chayqalishi aniqlangan.
Qayd etilishicha, ayni paytda Davron Merganovning umumiy ahvoli barqaror va qoniqarli deb baholanmoqda. U shifokorlar nazorati ostida davolanish hamda tiklanish jarayonini davom ettirmoqda.
Klub rahbariyati va matbuot xizmati muxlislardan faqat rasmiy manbalarda e’lon qilinadigan ma’lumotlarga tayanishni so‘ragan.
