Irlandiyalik aralash yakkakurash ustasi Konor Makgregor UFCdagi navbatdagi raqibi sifatida Maks Xollouyeyni ko‘rishni istayotganini ma’lum qildi. Sobiq ikki vazn toifasida UFC chempioni amerikalik jangchiga qarshi trilogiya jangini o‘tkazish va ular o‘rtasidagi hikoyani yakunlash niyatida. Makgregor bu haqda X ijtimoiy tarmog‘idagi sahifasida muxlislar bilan muloqot chog‘ida ma’lum qildi.

Muxlislardan biri irlandiyalik jangchidan UFCdagi shartnoma bo‘yicha so‘nggi jangini Maykl Chendler yoki Dastin Porega qarshi o‘tkazish ehtimoli, shuningdek, boshqa variantlari bor yoki yo‘qligi haqida so‘radi. Makgregor esa navbatdagi jang uchun Maks Xollouyey eng maqbul raqib ekanini ta’kidladi.

“Bu Xollouyey bo‘lishi kerak. Shubhasiz, men shoshildim. Ammo bu sabrsizlik va darhol oldinga intilish — janglardan tashqarida o‘tgan besh yilning oqibati. Men buni o‘zim uchun belgilab qo‘ydim va bu xatoni tuzataman. Keyingi safar hammasini to‘g‘ri amalga oshiraman”, deya javob berdi sobiq chempion.

Shuningdek, Konor Makgregor o‘zining jismoniy holati haqida ham gapirib o‘tdi:

“Men juda xotirjam edim. Bu tushlik olish uchun do‘konga kirishga o‘xshardi. Faqat tushlik — raqib edi”.

Eslatib o‘tamiz, Konor Makgregor va Maks Xollouyey 12-iyul kuni AQSHning Las-Vegas shahrida bo‘lib o‘tgan UFC 329 turnirining markaziy jangida o‘zaro to‘qnash keldi. Jangning dastlabki soniyalaridayoq Konor sirpanib ketib, tizzasidan jiddiy jarohat oldi. Natijada bahs muddatidan oldin, birinchi raundning o‘zidayoq to‘xtatilib, Maks Hollouyeyning g‘alabasi bilan yakunlangan edi.