Buxoro futbol akademiyasiga qarashli stadion chimi bilan bog‘liq muammo sabab ushbu arena vaqtinchalik Superliga stadionlari ro‘yxatidan chiqarilgan edi. O‘zPFL matbuot xizmati stadion ahvoli va keyingi uchrashuvlar taqdiri bo‘yicha rasmiy ma’lumot berdi.

Tashkilot xabariga ko‘ra, chim parvarishiga bo‘lgan loqaydlik sabab katta mablag‘ evaziga yangilangan maysa holatida jiddiy salbiy o‘zgarnishlar kuzatilgan. Buxoro futbol akademiyasi stadioni parvarishi uchun zarur texnikani xarid qilish masalasi asossiz ravishda kechiktirilgan.

Shunga qaramay, Liga muxlislar manfaatini inobatga olib, «Buxoro» klubiga mavsumni o‘z shahrida boshlashga ruxsat bergan edi. Biroq keyinchalik bu ishonch oqlanmagach, Superliga 13-turidan o‘rin olgan «Buxoro» — «Bunyodkor» uchrashuvi neytral maydonga ko‘chirildi.

Ma’lum qilinishicha, maysa uchun maxsus texnika yaqin kunlarda Buxoro shahriga yetib keladi. Endilikda ushbu texnikadan foydalana oladigan soha mutaxassislari tanqisligini bartaraf etish muhim ahamiyat kasb etmoqda.

«Liga Buxorodagi stadion chimi holatini to‘liq monitoring qilib bormoqda va endilikda Superliga 15-turidan o‘rin olgan «Buxoro» — «Lokomotiv» uchrashuvi Buxoro futbol akademiyasida o‘tkazilishiga ruxsat beriladi. Biroq maysa parvarishi bo‘yicha zarur chora-tadbirlar amalga oshirilmasa, 17-turdagi «Buxoro» — OKMK uchrashuvi va undan keyingi o‘yinlar uchun stadion yana man etiladi», — deyiladi Liga xabarida.

O‘zPFL buxorolik futbol ishqibozlarining xohish-istaklaridan kelib chiqib, viloyat mutasaddilari, futbol assosiasiyasi hamda klub mas’uliyatni to‘liq his qilishiga va maydon ahvoliga bo‘lgan munosabat ijobiy tomonga o‘zgarishiga umid bildirgan.