Armaniston va Rossiya sharafini himoya qiluvchi, yengil vaznda UFC reytingining ikkinchi raqamli jangchisi Arman Sarukyan navbatdagi jangini yengil vaznda sobiq UFC chempioni va BMF kamari sohibi Charlz Oliveyraga qarshi o‘tkazadi. Bu haqda X ijtimoiy tarmog‘idagi Red Fury MMA akkaunti xabar berdi.
Sportchilar uchun bu revansh jangi bo‘ladi. Ular o‘rtasidagi ilk bahs 2024 yil 13 aprelda bo‘lib o‘tgan va unda Sarukyan hakamlarning bo‘lingan qarori bilan g‘alaba qozongan edi.
Arman Sarukyan 29 yoshda. Rossiyalik va armanistonlik jangchining MMAdagi professional rekord hisobida 23 ta g‘alaba (15 tasi muddatidan oldin) va 3 ta mag‘lubiyat bor. «Axalkalakes» laqabli jangchi aralash yakkakurashlardagi professional faoliyatini 2015 yilning sentyabrida boshlagan va 2019 yilning aprelidan beri UFC bilan hamkorlik qilib kelmoqda. U erkin kurash va MMA bo‘yicha sport ustasi hisoblanadi.
