Portugaliya milliy terma jamoasi sardori Krishtianu Ronaldu singlisining eri Aleksandr Bertoluchchi Braziliyada tergov doirasiga tushdi. Bu haqda Sports.kz nashri Daily Mail'ga tayanib xabar berdi.

Braziliya huquqni muhofaza qiluvchi organlari tadbirkorning noqonuniy xo‘roz janglarini tashkil etishga aloqador yoki yo‘qligini tekshirmoqda. Tergov xo‘rozlarni yashirin janglarda qatnashtirish uchun ko‘paytirish va tayyorlash haqidagi xabarlardan so‘ng boshlangan.

Manba ma’lumotiga ko‘ra, polisiya o‘tkazgan reyd davomida eng tajovuzkor zotlardan biri hisoblangan mura turiga mansub taxminan 1500 ta jangovar xo‘roz aniqlangan. Tergovchilarning ta’kidlashicha, parrandalarlar talabga javob bermaydigan sharoitda saqlangan, ularning ayrimlarida esa og‘ir jarohatlar aniqlangan.

Bertoluchchi esa o‘z navbatida barcha ayblovlarni qat’iy rad etdi. U noqonuniy faoliyatda ishtirok etmaganini va xo‘roz janglarini tashkil etishga hech qanday aloqasi yo‘qligini bildirdi.

Tergov davom etmoqda. Huquqni muhofaza qiluvchi organlar tadbirkorning ushbu ishga aloqadorligi yuzasidan hozircha yakuniy xulosa e’lon qilmagan.