FIFA Ispaniya terma jamoasi va «Barselona» yarim himoyachisi Gaviga nisbatan 2026 yilgi jahon chempionati finalidan keyin sodir bo‘lgan mojarolardagi ehtimoliy nosportcha xatti-harakatlari yuzasidan tekshiruv boshladi. Bu haqda Mundo Deportivo nashri xabar berdi.
Ispaniya Argentina ustidan qo‘shimcha bo‘limlarda 1:0 hisobida g‘alaba qozonib, jahon chempioniga aylangan finaldan keyin bir qator to‘qnashuvlar yuz bergan edi.
Manba ma’lumotiga ko‘ra, Gaviga kamida bir o‘yinlik diskvalifikasiya tahdid solmoqda.
Ispaniya Qirollik futbol federasiyasi (RFEF) esa ushbu qaror yuzasidan apellyasiya tayyorlamoqda. Uni topshirishning so‘nggi muddati 4 avgust, seshanba kuni hisoblanadi.
RFEF Gavi hech qanday qoidabuzarlik qilmaganini, aksincha, Argentina terma jamoasi yarim himoyachisi Leandro Paredes tomonidan hujumga uchraganini isbotlashga harakat qiladi.
Federasiya dalil sifatida videotasvirni keltirishni rejalashtirgan. Unda to‘qnashuv oqibatida yerga aynan Gavi yiqilgani aks etgani ta’kidlanmoqda.
