Madridning «Real» klubi himoyachisi Viktor Valdepenyas faoliyatini Italiyaning «Fiorentina» jamoasida davom ettiradi. Bu haqda klub matbuot xizmati rasman ma’lum qildi.

Ommaviy axborot vositalari ma’lumotiga ko‘ra, 19 yoshli futbolchi «Fiorentina» bilan 5 yillik shartnoma imzolagan.

Transfer shartlariga ko‘ra, «Real» ushbu kelishuvdan 8 million yevro oladi. Shuningdek, madridliklar futbolchi kelajakda boshqa klubga sotilsa, transfer summasining 50 foizini qo‘lga kiritadi. Bundan tashqari, «Real» Valdepenyasni birinchi bo‘lib qayta sotib olish huquqini ham saqlab qolgan.

«Fiorentina» kabi buyuk klubga kelganimdan juda xursandman», — dedi futbolchi.

Viktor Valdepenyas 2018 yilda «Rayo Valyekano» akademiyasidan «Real» tizimiga o‘tgan edi.

Ispaniyalik himoyachi «Real» asosiy jamoasi safidagi debyutini 2025 yil dekabr oyida Ispaniya chempionatida «Alaves»ga qarshi bahsda (2:1) zaxiradan maydonga tushib o‘tkazgan.