«Barselona» portugaliyalik himoyachi Joau Kanseluning to‘liq transferini yakunlashga yaqin turibdi.
Ispaniyaning Diario SPORT nashri xabariga ko‘ra, Kataloniya klubi futbolchini sotib olish bo‘yicha Saudiya Arabistonining «Al-Hilol» klubi bilan bitimni yaqin kunlarda yopadi. 32 yoshli himoyachining transferi uchun kompensasiya summasi taxminan 10 million yevroni tashkil etadi.
Kanseluning o‘zi «ko‘k-anorranglilar» bilan ikki yillik shartnomani kelishib olgan. Portugaliyalik futbolchi transfer oynasi boshidanoq o‘z ustuvor maqsadini aniq belgilab olgan edi: u «Spotifay Kamp Nou»ga qaytishni xohladi va faoliyatini davom ettirish bo‘yicha boshqa muqobil variantlarni rad etdi.
