Marokashda FIFA rahbariyatining uchrashuvi bo‘lib o‘tdi, unda tashkilot prezidenti Janni Infantino, bosh kotib Mattias Grafstryom va boshqaruv kengashi a’zolari ishtirok etdi.
FIFA bosh kotibi hamda kengash a’zolari FIFA prezidenti Janni Infantinoni to‘liq qo‘llab-quvvatlashlarini tasdiqlashdi. shuningdek, FIFAning tijoriy huquqlarini sotish va turnirlarni o‘tkazish bo‘yicha operativ faoliyat bilan shug‘ullanishi kerak bo‘lgan FIFA Forward Enterprise (FFE) kompaniyasini tashkil etish taklifi tayyorgarlik jarayonida xatoliklarga yo‘l qo‘yilgani sababli kun tartibidan olib tashlangani e’lon qilindi.
«Loyiha qaytarib olingach, FIFA endilikda o‘zining halolligi, boshqaruv sifati va belgilangan tartib-qoidalarga rioya qilinishiga nisbatan har qanday hujumlarga toqat qilmasligi hamda o‘z nomi va obro‘sini himoya qilish uchun barcha zarur choralarni ko‘rishi kelishib olindi.
Har doim o‘rganadigan narsa topiladi va FIFA orttirilgan tajribani inobatga olgan holda o‘z jarayonlarini takomillashtirishda davom etadi. Shu bilan birga, ushbu holatda shuni ta’kidlash muhimki, yo‘l qo‘yilgan xatolarga qaramay, barcha harakatlar FIFAning normativ bazasiga to‘liq muvofiq holda amalga oshirilgan.
FIFA barcha 211 ta a’zo-assosiasiya, konfederasiyalar va mintaqaviy assosiasiyalar manfaatlari yo‘lida FIFA Forward dasturi orqali futbolni rivojlantirishni yanada qo‘llab-quvvatlash yo‘llarini ko‘rib chiqish uchun tegishli manfaatdor tomonlar bilan yaqindan hamkorlik qiladi», — deyiladi press-relizda.
Tashkilot, shuningdek, o‘z obro‘siga qilingan hujumlarga chidab turmasligi va uni himoya qilish uchun barcha zarur choralarni ko‘rishini ma’lum qildi.
28 iyul kuni FIFA tashkilotning media va tijoriy huquqlarini, shu jumladan jahon chempionatlari huquqlarini topshirish rejalashtirilgan yangi tuzilmani tashkil etish niyatida ekanini xabar qilgan edi. Uning 20 foizdan ortiq aksiyalarini sotish ko‘zda tutilgandi. Xususiy investorlar bu ulushlar uchun taxminan 4,2 milliard dollar to‘lashlari va FIFA bu mablag‘larni futbolni rivojlantirishga sarflashni va’da qilgan edi.
