Jeydon Sancho yana bir bor Dortmundning «Borussiya» klubiga qaytishi mumkin. 26 yoshli futbolchi erkin agentga aylandi — uning «Manchester Yunayted» bilan shartnomasi o‘z nihoyasiga yetdi.
Transfer News Live nashrining Sky Sports'ga tayanib xabar berishicha, «asalarilar» angliyalik futbolchining vakillari bilan muzokaralarni davom ettirmoqda. O‘yinchi bir nechta Yevropa va Saudiya klublari bilan og‘zaki kelishuvga ega, ammo u hali yakuniy qarorga kelgani yo‘q.
Sancho 2017 yildan 2021 yilgacha «Borussiya» safida to‘p surgan, so‘ngra 2023/24 yilgi mavsumning ikkinchi yarmini jamoada ijara asosida o‘tkazgan edi. O‘tgan mavsumda vingerni ijaraga olgan «Aston Villa» uni to‘liq sotib olishga qiziqish bildirmadi.
