Olmaotada yangi futbol stadioni quriladigan joyda dastlabki tayyorgarlik ishlari boshlandi. Loyihaga ko‘ra, yangi arena 45 ming tomoshabinga mo‘ljallangan bo‘lib, u Qozog‘istondagi eng yirik sport inshootiga aylanadi, deb xabar bermoqda Tengrinews.kz nashri.
Qariyb 32 gektar maydonni egallaydigan hududda asosiy va mashg‘ulot maydonlari, jamoalar uchun maxsus xonalar hamda muxlislar uchun alohida zonalar qurilishi rejalashtirilgan. Ayni paytda mutaxassislar hududning seysmik holatini hisobga olgan holda tuproq xususiyatlarini o‘rganmoqda.
Shahar hokimligining ma’lum qilishicha, ob’ektni foydalanishga topshirishning aniq muddatlari loyiha-smeta hujjatlari to‘liq tasdiqlanganidan so‘nggina e’lon qilinadi.
Olmaota shahri qurilish boshqarmasi loyihalash bo‘limi rahbari Sirim Turlibi stadion qurilishi jarayoni haqida batafsil ma’lumot berdi:
“Hozirgi vaqtda qurilish boshqarmasi bo‘lajak stadion uchun sinov tariqasida poydevor qoziqlarini (svayalarini) tekshirishdan o‘tkazmoqda. Bu jarayon yakunlangach, qancha tayanch konstruksiyalari kerak bo‘lishi aniq belgilanadi. Stadionning eskiz loyihasi UYEFAning to‘rtinchi toifasi talablariga, shuningdek, Qozog‘iston futbol federasiyasining texnik topshirig‘iga to‘liq muvofiq tarzda ishlab chiqilgan”.
Ma’lumot o‘rnida, avvalroq Toshkent shahrida ham qiymati 100 million dollarga teng bo‘lgan 55 ming o‘rinli yangi stadion barpo etilishi haqida xabar berilgan edi. Mazkur arena 2027-yilda O‘zbekiston va Ozarbayjon mamlakatlari hamkorligida o‘tkaziladigan 20 yoshgacha bo‘lgan futbolchilar o‘rtasidagi Jahon chempionati uchrashuvlariga mezbonlik qilishi kutilmoqda.
