«Barselona»ning sobiq futbolchisi Serxi Roberto faoliyatini MLSda davom ettiradi.

Ispaniyalik tajribali yarimhimoyachi «Los-Andjeles Gelaksi» klubiga o‘tishga juda yaqin turibdi. Bu haqda taniqli insayder Fabrisio Romano xabar bermoqda.

Manbaning ta’kidlashicha, tomonlar o‘rtasida og‘zaki kelishuvga erishib bo‘lingan. 34 yoshli futbolchi Amerika klubining taklifini qabul qilgan va endilikda transferni rasman yakunlash uchun qolgan rasmiyatchiliklarni hal qilish lozim. Hozircha shartnoma tafsilotlari va moliyaviy shartlari oshkor qilinmayapti.

Serxi Robertoning so‘nggi klubi Italiyaning «Komo» jamoasi bo‘lib, u joriy yilning iyun oyida klubni tark etgan edi. Futbolchi, shuningdek, faoliyatining asosiy qismini Kataloniyaning «Barselona» klubida o‘tkazgan.