«Real»ning sobiq hujumchisi Xavyer Ernandes Madrid klubida birga to‘p surgan Garet Beylga yuqori baho berdi.

«Garet Beyl ajoyib edi, men uni juda yaxshi ko‘raman. Uni go‘yoki ispanchada gapirishni xohlamagani uchun tanqid qilishardi, lekin u tilni ham bilardi, ham tushunardi. Kiyinish xonasida u ajoyib yigit edi.

Men u bilan juda yaqin munosabatda edim. Luka Modrich va Toni Kroos bilan ham xuddi shunday — ular ispan tilida yaxshi gapirishardi, lekin o‘z tillarida yoki inglizchada muloqot qilishni afzal ko‘rishardi, shuning uchun men ular bilan inglizchada gaplashardim.

Beyl ajoyib futbolchi edi va hanuzgacha munosib baholanmay keladi. O‘ylashimcha, u dunyoning eng yaxshi o‘yinchilaridan biri.

Men u atrofidagi ko‘plab voqealarni umuman tushunmayman. U Chempionlar Ligasi finallari tarixidagi eng ajoyib gollardan birini urdi. U necha marta Chempionlar Ligasini yuta oldi? Qancha britaniyalik futbolchi bu turnirda uch yoki to‘rt marta g‘alaba qozongani bilan maqtana oladi (Beyl besh karra Chempionlar Ligasi g‘olibi hisoblanadi)? Ammo bu haqda negadir deyarli gapirishmaydi.

Tasavvur qiling: chapda Krishtianu Ronaldu, o‘ngda Garet Beyl, markazda esa Karim Benzema. Bu jinnilik. Keyin odamlar: «Chicharito u yerga borib, zaxirada o‘tirdi», deyishadi. Axir albatta-da! Men boshqa nima qilishim kerak edi? Agar to‘rtta hujumchi bilan o‘ynaganimizda, balki maydonga tushgan bo‘lardim.

Keyinchalik Beyl va Karim jarohat olishdi, men Krishtianu bilan birga o‘ynay boshladim va o‘zimni yaxshi tomondan ko‘rsatib, muhim gollar urdim. Lekin sizda bu uchlik bo‘lsa, boshqa nima qoldi? Agar siz raqib himoyachisi bo‘lsangiz, sizga juda og‘ir bo‘ladi. Bunday o‘yindan so‘ng uxlab qolish qiyin», — dedi Chicharito.