«Roma» «Lion» vingeri Malik Fofanani yangi mavsum oldidan hujum chizig‘ini kuchaytirish uchun asosiy nomzod sifatida ko‘rib chiqmoqda. Bu haqda Corriere dello Sport xabar berdi.

Italiya klubi avvalroq «RB Leypsig» futbolchisi Antoniu Nusani transfer qilishga harakat qilgan. Biroq ushbu kelishuvni amalga oshirish qiyinlashgach, «Roma» e’tiborini Fofanaga qaratgan.

Bosh murabbiy Jan Pyero Gasperini 20 yoshli belgiyalik futbolchining uslubini jamoaga mos deb hisoblamoqda. «Roma» Fofananing transferi uchun taxminan 40 mln yevro sarflash variantini ham ko‘rib chiqishga tayyor.

«Lion» dastlab Fofanani sotishni rejalashtirmagan. Biroq klubning moliyaviy holati va Chempionlar ligasiga chiqish masalasi transfer bozorida muhim qarorlar qabul qilinishiga sabab bo‘lishi mumkin.

Ayni vaqtda futbolchining jismoniy holati bo‘yicha ham savollar mavjud. Fofana yaqinda to‘pig‘idan jarohat olgan.

Belgiyalik futbolchiga «RB Leypsig» ham qiziqish bildirmoqda. Germaniya klubi Yan Diomandening o‘rniga yangi futbolchi izlamoqda va ushbu transferdan keyin yetarlicha moliyaviy imkoniyatga ega.

«Lion» Brunu Gimaraynsning «Arsenal»ga transferidagi 20 foizlik keyingi sotuv ulushi tufayli taxminan 8 mln yevro olishi kutilmoqda. Fofana 40 mln yevroga sotilsa, fransuz klubi uchun yana bir yirik moliyaviy tushum yuzaga keladi.