«Рома» «Лион» вингери Малик Фофанани янги мавсум олдидан ҳужум чизиғини кучайтириш учун асосий номзод сифатида кўриб чиқмоқда. Бу ҳақда Corriere dello Sport хабар берди.

Италия клуби аввалроқ «РБ Лейпциг» футболчиси Антониу Нусани трансфер қилишга ҳаракат қилган. Бироқ ушбу келишувни амалга ошириш қийинлашгач, «Рома» эътиборини Фофанага қаратган.

Бош мураббий Жан Пьеро Гасперини 20 ёшли бельгиялик футболчининг услубини жамоага мос деб ҳисобламоқда. «Рома» Фофананинг трансфери учун тахминан 40 млн евро сарфлаш вариантини ҳам кўриб чиқишга тайёр.

«Лион» дастлаб Фофанани сотишни режалаштирмаган. Бироқ клубнинг молиявий ҳолати ва Чемпионлар лигасига чиқиш масаласи трансфер бозорида муҳим қарорлар қабул қилинишига сабаб бўлиши мумкин.

Айни вақтда футболчининг жисмоний ҳолати бўйича ҳам саволлар мавжуд. Фофана яқинда тўпиғидан жароҳат олган.

Бельгиялик футболчига «РБ Лейпциг» ҳам қизиқиш билдирмоқда. Германия клуби Ян Диоманденинг ўрнига янги футболчи изламоқда ва ушбу трансфердан кейин етарлича молиявий имкониятга эга.

«Лион» Бруну Гимарайнснинг «Арсенал»га трансферидаги 20 фоизлик кейинги сотув улуши туфайли тахминан 8 млн евро олиши кутилмоқда. Фофана 40 млн еврога сотилса, француз клуби учун яна бир йирик молиявий тушум юзага келади.