«Liverpul» afsonasi Jeymi Karrager Ronald Arauxoning «Barselona»dan Angliya klubiga o‘tishi mumkinligi haqida o‘z fikrlarini bildirdi. Sobiq himoyachi urugvaylik futbolchining kuchli jihatlarini e’tirof etgan bo‘lsa-da, transferning uzoq muddatli istiqboliga shubha bilan qaramoqda.

Arauxo «Liverpul»ga bir mavsumlik ijara asosida o‘tishi kutilmoqda. Angliya klubi kelasi yozda futbolchini doimiy ravishda sotib olish huquqiga ega bo‘ladi. Himoyachi transferni rasmiylashtirishdan oldin tibbiy ko‘rikdan o‘tish uchun Mersisaydga borishi rejalashtirilgan.

Karrager urugvaylik futbolchining jismoniy tayyorgarligi, agressiv o‘yin uslubi va bir nechta pozisiyada harakat qila olishini yuqori baholadi. Shuningdek, Arauxoning «Barselona» sardori bo‘lgani va yuqori darajadagi muhim uchrashuvlarda tajriba orttirganini ta’kidladi.

«U jismonan juda kuchli, agressiv va markaziy himoyachi yoki o‘ng qanot himoyachisi sifatida o‘ynay oladi. Uning tajribasi ham yuqori. U «Barselona»ga sardorlik qilgan va katta o‘yinlarda maydonga tushgan», — dedi Karrager.

Ekspert ijara shartnomasini ham «Liverpul» uchun xavfi kam variant sifatida baholadi. Uning fikricha, klub bir mavsum davomida Arauxoning jamoaga moslashishini kuzatib, keyin uni doimiy ravishda sotib olish haqida qaror qabul qilishi mumkin.

Biroq Karrager futbolchining qaror qabul qilishi, diqqatni jamlashi va barqarorligi Premyer-ligada muammo tug‘dirishi mumkinligidan ogohlantirdi.

«Uning jangovarligi yaxshi, u kurashlarga dadil kiradi. Ammo bunday darajada himoyada o‘ynash qaror qabul qilish, diqqat va o‘yinni oldindan o‘qiy bilishni talab qiladi», — dedi u.

Karrager, shuningdek, Arauxoning intizom bilan bog‘liq muammolari va so‘nggi paytlardagi formasi pasayganiga e’tibor qaratdi. Urugvaylik himoyachi kuchli raqiblarga qarshi o‘yinlarda ba’zan oson jarima zarbalariga sabab bo‘lishi yoki qizil kartochka olishi mumkinligini aytdi.

Sobiq futbolchi «Liverpul» Ibraima Konatening «Real Madrid»ga ketganidan keyin tajribaliroq markaziy himoyachiga e’tibor qaratishi kerak edi, deb hisoblaydi.

«Liverpul» 19 yoshli Pau Kubarsi bilan asosiy tarkib uchun kurashla ko‘p hollarda zaxirada qolgan futbolchi o‘rniga tajribaliroq markaziy himoyachini tanlashi kerak edi», — dedi Karrager.

Uning fikricha, Arauxoning «Barselona»da asosiy tarkib futbolchisi bo‘la olmaganidan keyin ijara asosida «Liverpul»ga kelishi jamoa uchun uzoq muddatli rejadan ko‘ra vaziyatga qarab qabul qilingan qarorga o‘xshaydi.