«Tottenxem» himoyachisi Kristian Romero Madridning «Atletiko» klubiga o‘tishga juda yaqin turibdi. Bu haqda insayder Nikolo Skira xabar bermoqda.

Manbaning xabariga ko‘ra, 28 yoshli argentinalik futbolchi «matraschilar» bilan mavsumiga 6 million yevro maosh evaziga 2030 yilgacha mo‘ljallangan shartnoma borasida kelishib olgan. Kelishuvda shartnomani yana bir yilga uzaytirish imkoniyati ham ko‘zda tutiladi.

Hozirda klublar transferning so‘nggi detallarini o‘zaro muvofiqlashtirishmoqda. Barcha tomonlar bitimning muvaffaqiyatli yakunlanishiga to‘liq ishonch bildirishmoqda.

Romero 2022 yildan beri «Tottenxem» sharafini himoya qilib keladi. O‘tgan mavsumda u barcha turnirlarni hisobga olgan holda 32 ta o‘yinda maydonga tushib, 6 ta gol urdi va 4 ta golli uzatmaga mualliflik qildi.