«Manchester Siti»ning yangi bosh murabbiyi Enso Mareska Xosep Gvardiola ketganidan so‘ng klubdagi ichki tartiblarni o‘zgartirishni boshladi.

Italiyalik mutaxassisning dastlabki qarorlaridan biri jamoa bazasidagi murabbiylar xonalariga taalluqli bo‘ldi. The Sun nashri xabariga ko‘ra, Mareska ilgari Gvardiolaning yordamchisi foydalangan kabinetni egalladi. Gvardiolaning o‘z kabineti esa jamoa yig‘ilishlari o‘tkaziladigan xonaga aylantirildi.

Ishni boshlashdan oldin Mareska Barselonada Gvardiola mehmoni bo‘lib, u bilan «Manchester Siti»ning hozirgi tarkibini bir necha soat davomida muhokama qildi. Murabbiylar, shuningdek, futbolchilarning fe’l-atvori va ularning asosiy tarkibda maydonga tushmaslikka bo‘lgan munosabati haqida ham gaplashib olishdi. Shu bilan birga, Mareska «Man Siti»dagi ishni o‘z uslubida yo‘lga qo‘yishni va Gvardiolaning yondashuvini ko‘chirmaslikni maqsad qilgan.

«Manchester Siti» yangi mavsumni 16 avgust kuni «Arsenal»ga qarshi Angliya Superkubogi uchun kechadigan o‘yin bilan boshlaydi.