«Komo» bosh murabbiyi Sesk Fabregas Londonning «Arsenal» klubidagi yosh iqtidorlar haqida o‘z fikrlarini bildirdi.

Chorshanba kuni Italiya jamoasi «Emireyts» stadionida «kanonirlar»ga qarshi o‘rtoqlik uchrashuvi o‘tkazdi. Bahsning asosiy vaqti 1:1 hisobida yakunlandi, penaltilar seriyasida esa «Arsenal» ustun keldi.

«Xeyl End» («Arsenal» yoshlar akademiyasi) ajoyib ish olib bormoqda. Bu yerda juda ko‘p iqtidorli futbolchilar bor. Ammo ularga ishonish va maydonda o‘ynash imkoniyatini berish kerak, aks holda ularning rivojlanishi to‘xtab qoladi.

Ular hamma narsa oson bo‘lmasligini tushunishi kerak. Ular kurashishi lozim. Hozir bu futbolchilar dunyoning eng yaxshi klublaridan birida o‘ynamoqda. Bu yerda hatto Maks Doumandek favqulodda iqtidor egasi uchun ham o‘zini ko‘rsatish oson emas», — deya Fabregasning so‘zlarini jurnalist Konnor Xamm keltirdi.

Fabregasning o‘zi 2003 yildan 2011 yilga qadar «Arsenal» sharafini himoya qilgan.

Mikel Arteta boshchiligidagi «Arsenal» yakshanba kuni Angliya Superkubogi uchun «Manchester Siti»ga qarshi maydonga tushadi.