"Manchester Yunayted" himoyachisi Nussair Mazraui jamoaning mavsumoldi o‘rtoqlik uchrashuvlaridagi o‘yiniga baho berdi.
Chorshanba kuni "qizil iblislar" "Lids" bilan asosiy vaqtda 1:1 hisobida durang o‘ynab, penaltilar seriyasida g‘alaba qozondi. Shanba kuni jamoa mavsumoldi tayyorgarligi doirasidagi so‘nggi o‘rtoqlik uchrashuvini "Milan"ga qarshi o‘tkazadi.
"Biz o‘tgan mavsumning ikkinchi yarmida qanday o‘ynagan bo‘lsak, hozir ham xuddi shunday harakat qilyapmiz, hatto ayrim jihatlarda yanada yaxshilandik. Maydonda nima qilishimiz kerakligi haqida aniq tasavvurga egamiz. Hatto o‘rtoqlik uchrashuvlarida ham ko‘zga yoqimli futbol namoyish etgan paytlarimiz bo‘ldi", — deya Mazrauining so‘zlarini The United Stand keltirdi.
22 avgust kuni Maykl Karrik boshchiligidagi "Manchester Yunayted" Angliya Premyer-ligasi yangi mavsumining 1-turida safarda "Xall Siti"ga qarshi maydonga tushadi.
