"Manchester Yunayted"ni tark etgan va ayni paytda erkin agent maqomida bo‘lgan Jeydon Sancho faoliyatini Angliyadan tashqarida davom ettirishga moyil. Bu haqda BBC xabar berdi.

Manbaga ko‘ra, 26 yoshli vingerga Angliya Premyer-ligasi klublaridan ham takliflar bor, biroq futbolchi xorijda o‘ynash variantini afzal ko‘rmoqda.

Sanchoga asosiy da’vogarlardan biri Dortmundning "Borussiya" klubi hisoblanadi. Angliyalik futbolchi avval ham ushbu jamoa safida to‘p surgan va uning hisobida "Borussiya" tarkibida 158 ta uchrashuv bor.

Sancho 2021 yilda "Borussiya"dan "Manchester Yunayted"ga o‘tgan edi. O‘tgan mavsumni u ijara asosida "Aston Villa"da o‘tkazib, 39 ta o‘yinda maydonga tushdi. Unai Emeri jamoasi bilan Yevropa ligasida g‘olib chiqdi.

Undan avvalgi mavsumda esa Sancho "Chelsi"da ijara asosida to‘p surib, 41 ta uchrashuvda ishtirok etgan. Kelishuvda futbolchini majburiy sotib olish bandi bo‘lgan, ammo London klubi "Manchester Yunayted"ga qariyb 6 mln yevro tovon puli to‘lab, futbolchini ortga qaytargan.

Ayni paytda Sancho jismoniy holatini saqlab turish maqsadida Angliyaning quyi divizionlarida ishtirok etuvchi "Flikston" klubi bilan mashg‘ulot o‘tkazmoqda.