"Манчестер Юнайтед"ни тарк этган ва айни пайтда эркин агент мақомида бўлган Жейдон Санчо фаолиятини Англиядан ташқарида давом эттиришга мойил. Бу ҳақда BBC хабар берди.
Манбага кўра, 26 ёшли вингерга Англия Премьер-лигаси клубларидан ҳам таклифлар бор, бироқ футболчи хорижда ўйнаш вариантини афзал кўрмоқда.
Санчога асосий даъвогарлардан бири Дортмунднинг "Боруссия" клуби ҳисобланади. Англиялик футболчи аввал ҳам ушбу жамоа сафида тўп сурган ва унинг ҳисобида "Боруссия" таркибида 158 та учрашув бор.
Санчо 2021 йилда "Боруссия"дан "Манчестер Юнайтед"га ўтган эди. Ўтган мавсумни у ижара асосида "Астон Вилла"да ўтказиб, 39 та ўйинда майдонга тушди. Унаи Эмери жамоаси билан Европа лигасида ғолиб чиқди.
Ундан аввалги мавсумда эса Санчо "Челси"да ижара асосида тўп суриб, 41 та учрашувда иштирок этган. Келишувда футболчини мажбурий сотиб олиш банди бўлган, аммо Лондон клуби "Манчестер Юнайтед"га қарийб 6 млн евро товон пули тўлаб, футболчини ортга қайтарган.
Айни пайтда Санчо жисмоний ҳолатини сақлаб туриш мақсадида Англиянинг қуйи дивизионларида иштирок этувчи "Фликстон" клуби билан машғулот ўтказмоқда.
