«Bavariya» sport direktori Maks Eberl yangi mavsumda Myunxen klubi rejalariga kirmagan Joau Palinya va Sasha Boe atrofidagi vaziyat haqida gapirib berdi.

Palinya «RB Leypsig»ga qarshi o‘rtoqlik o‘yinida (3:1) maydonga tushmadi, chunki uning transferi bo‘yicha muzokaralar davom etmoqda.

«Muzokaralar kechmoqda, transfer amalga oshishi mumkin. Shu sababli biz tavakkal qilishni xohlamadik», — deydi Eberl Goal.com nashriga.

«Aston Villa» bilan muzokaralar barbod bo‘lgach, futbolchi faoliyatini davom ettirishi uchun eng ehtimoliy variant «Nyukasl» bo‘lib turibdi — klubga Bruno Gimaraes ketganidan keyin uning o‘rnini bosadigan o‘yinchi zarur. Palinya 2024 yilning yozida «Fulxem»dan «Bavariya»ga 50 million yevro evaziga o‘tgan, ammo bildirilgan ishonchni oqlay olmagan edi. Portugaliyalik futbolchi o‘tgan mavsumni «Tottenxem»da ijarada o‘tkazdi, biroq London klubi yakunda uni sotib olish huquqidan foydalanmadi. Oldinroq «Bavariya» Palinyani faqatgina 25 million yevro atrofida to‘liq sotishga umid qilgan bo‘lsa, endilikda klub ijara variantini ham ko‘rib chiqishga tayyor.

Boe bilan bog‘liq vaziyat hozircha kamroq aniqlikka ega. O‘ng qanot himoyachisi «Leypsig»ga qarshi o‘yinda Konrad Laymer jarohat olgach, to‘qqizinchi daqiqadayoq maydonga tushdi va yaxshi o‘yin ko‘rsatdi. Shunga qaramay, Eberl 25 yoshli fransuz futbolchisini jamoada olib qolishdan ma’no yo‘q deb hisoblaydi.

«Sashada mahorat bor, bunga shak-shubha yo‘q. Ammo hozirda o‘ng qanotimizda asosan Stanishich va Laymer o‘ynamoqda. Uni jamoada olib qolish moliyaviy va sport nuqtai nazaridan noto‘g‘ri bo‘lar edi», — dedi Eberl.

«Bavariya» Palinya, Boe hamda jarohat olgan Brayan Saragosaga yangi mavsumda jamoada muhim rol o‘ynashmasligini ma’lum qilib bo‘lgan. Boe o‘tgan mavsumning ikkinchi yarmini «Galatasaroy»da, Saragosa esa «Roma»da ijarada o‘tkazgan edi.