Yarim o‘rta vazn toifasida UFC chempioni Islom Maxachev Yan Machado Gerriga qarshi kechgan besh raundlik jangdan so‘ng tez orada yana oktagonga qaytishni rejalashtirmoqda. Filadelfiyada o‘tgan UFC 330 turniridan keyingi matbuot anjumanida rossiyalik jangchi o‘z rejalari bilan o‘rtoqlashdi.

“Ramazongacha yana bir marta jang qilishimiz kerak. Yanvarda yoki yil oxirigacha oktagonga chiqishim lozim. Endi yigirma yoshli yigitcha emasman, yoshim 34 da va iloji boricha tez-tez jang qilishim kerak. Ko‘p vazn tashlamayman, jiddiy jarohatlarim ham yo‘q. Ehtimol, burnimni yana bir marta tekshirtirib olishim kerakdir, biroq shuning o‘zi yetarli”.

Shuningdek, Maxachev yarim o‘rta vazn toifasiga hali to‘liq moslashib ulgurmaganini va kelgusi janggacha jismonan kuchaymoqchi ekanini ta’kidladi:

“Og‘ir janglar insonni toblaydi, men ham yanada kuchayganimni his qilyapman. Hali yana vazn yig‘ishim va kuchliroq bo‘lishim kerak, buning uchun esa menda vaqt bor. Ushbu jang shuni ko‘rsatdiki, to‘qnashuv qanchalik oson yoki qiyin bo‘lmasin, men uchun u birinchi soniyadan to oxirgisigacha haqiqiy urushdir”.

Navbatdagi raqib kim bo‘lishi haqidagi savolga esa rossiyalik jangchi anchadan buyon titul jangiga loyiq bo‘lib kelayotgan Karlos Pratesni tanlagan bo‘lishini aytib o‘tdi.