"Manchester Siti" "Chelsi" yarim himoyachisi Enso Fernandesni sotib olish imkoniyatini hali ham ko‘rib chiqmoqda. Insayder Fabrisio Romano ma’lumotiga ko‘ra, manchesterliklar londonliklar belgilagan muddat o‘tib ketganidan keyin ham argentinalik futbolchining vakillari bilan aloqani davom ettirgan.
"Chelsi" Enso bo‘yicha 14 avgust, juma kuni Britaniya vaqti bilan soat 17:00 gacha 120 million funtlik rasmiy taklif qabul qilishini bildirgan edi. Biroq belgilangan vaqtga qadar "Manchester Siti" yoki boshqa klubdan bunday taklif kelib tushmadi. Shu sabab londonliklar hozircha futbolchini 2026/27 yilgi mavsumda jamoada olib qolishni kutmoqda.
Shunga qaramay, Romano xabaricha, "Siti" transferga yana qaytish imkoniyatini ichki muhokama qilmoqda. Klub Enso atrofidagi vaziyatni kuzatishda davom etyapti, ammo "Chelsi" talab qilayotgan mablag‘ kelishuv yo‘lidagi asosiy to‘siq bo‘lib turibdi.
25 yoshli Fernandes "Manchester Siti" tomonidan Rodrining ehtimoliy o‘rinbosarlaridan biri sifatida ko‘rilmoqda. "Siti" bosh murabbiyi Enso Mareska argentinalik yarim himoyachi bilan avval "Chelsi"da birga ishlagan.
