"Манчестер Сити" "Челси" ярим ҳимоячиси Энцо Фернандесни сотиб олиш имкониятини ҳали ҳам кўриб чиқмоқда. Инсайдер Фабрицио Романо маълумотига кўра, манчестерликлар лондонликлар белгилаган муддат ўтиб кетганидан кейин ҳам аргентиналик футболчининг вакиллари билан алоқани давом эттирган.
"Челси" Энцо бўйича 14 август, жума куни Британия вақти билан соат 17:00 гача 120 миллион фунтлик расмий таклиф қабул қилишини билдирган эди. Бироқ белгиланган вақтга қадар "Манчестер Сити" ёки бошқа клубдан бундай таклиф келиб тушмади. Шу сабаб лондонликлар ҳозирча футболчини 2026/27 йилги мавсумда жамоада олиб қолишни кутмоқда.
Шунга қарамай, Романо хабарича, "Сити" трансферга яна қайтиш имкониятини ички муҳокама қилмоқда. Клуб Энцо атрофидаги вазиятни кузатишда давом этяпти, аммо "Челси" талаб қилаётган маблағ келишув йўлидаги асосий тўсиқ бўлиб турибди.
25 ёшли Фернандес "Манчестер Сити" томонидан Родрининг эҳтимолий ўринбосарларидан бири сифатида кўрилмоқда. "Сити" бош мураббийи Энцо Мареска аргентиналик ярим ҳимоячи билан аввал "Челси"да бирга ишлаган.
