«Liverpul» AXA mashg‘ulot markazida o‘tkazilgan qisqartirilgan mavsum oldi o‘rtoqlik o‘yinida «Komo» bilan 0:0 hisobida durang o‘ynadi. Jamoaning yangi xaridi Viktor Munyos «qizillar» safida eng yorqin o‘yin ko‘rsatgan futbolchilardan biri bo‘ldi.

70 daqiqa davom etgan ushbu uchrashuv ikki jamoa o‘rtasida «Enfild»da kechishi rejalashtirilgan kechki asosiy o‘yin oldidan yopiq eshiklar ortida tashkil etildi. Unda ikki bosh murabbiy — Andoni Iraola va Sesk Fabregas ishtirok etishdi.

Aleksis Mak Allister ham Argentina terma jamoasi bilan Jahon chempionati finaligacha yetib borganidan so‘ng mavsum oldi tayyorgarlikdagi ilk o‘yinini o‘tkazdi.

Argentinalik yarim himoyachi Trey Nyoni va Jeyms Makkonnell bilan birga maydon markazida harakat qildi. Hujum triosini esa Xarvi Elliott, Federiko Kyeza va Viktor Munyos tashkil etdi.

Munyos o‘yin boshidanoq e’tiborni tortdi: u Mak Allister bilan o‘zaro pas o‘ynab, «Komo»ning o‘ng qanot himoyachisi Ivan Smolchichni aldab o‘tdi va Nyoniga juda ajoyib uzatma yetkazdi, ammo Treyning bosh bilan yo‘llagan zarbasi darvoza to‘sini ustidan o‘tib ketdi.

Ispaniyalik futbolchi bahsning dastlabki daqiqalarida «Komo» himoyachilariga doimo xavf soluvchi eng faol o‘yinchi bo‘ldi.

Mak Allister ham maydon markazidan turib o‘yinni ajoyib tarzda boshqardi. U maydon bo‘ylab aniq uzatmalar yetkazib berdi va birinchi bo‘lim tugashi oldidan Kyezaga xavfli pas uzatib, golli vaziyat yaratdi.

Tanaffusdan so‘ng «Liverpul» hujumda qiynaldi va tarkibga kiritilgan o‘zgarishlar o‘yinga temp olib kelguniga qadar hisob ochilmay qoldi.

Kiran Morrison, Uill Rayt va Lyuis Kumas hujum chizig‘idagi uchlikni almashtirishdi. Zaxiradan tushgan Kumas darhol xavfli zarba yo‘lladi.

Shundan so‘ng «qizillar» raqib maydonida to‘pni ko‘proq olib qo‘ya boshlashdi, Rayt va Kumasda hisobni ochish uchun yaxshi imkoniyatlar paydo bo‘ldi.

Uchrashuvning so‘nggi daqiqalarida «Liverpul» tarkibda yana bir qator almashtirishlarni amalga oshirdi va maydonga Mor Talla NdiaYE, Lukas Putt hamda Josh Sonni-Lambi tushirildi.