«Inter Mayami» bosh murabbiyi Gilyermo Oyos otasi Xorxe Messining vafotidan so‘ng jamoa ixtiyoriga qaytgan hujumchi Lionel Messining holati haqida gapirdi.

Xorxe Messi 8 avgust kuni Argentinaning Rosario shahridagi shifoxonada vafot etgan edi. U 68 yoshda bo‘lgan.

«U yaxshi ko‘rinyapti, maydonda — o‘zi juda yaxshi biladigan joyda — o‘zini yaxshi namoyon qilmoqda va xotirjam holatda. Menimcha, futbolchilardan ko‘pincha haddan tashqari foydalaniladi. Ularga juda katta yuklama tushadi, chunki tiklanish uchun ko‘p hollarda yetarlicha vaqt bo‘lmaydi. Bunga parvozlar, o‘yinlar taqvimi yoki issiq ob-havo sabab bo‘lishi mumkin.

Masalan, hozir havo namligi 87 foizni tashkil etyapti. Futbolchilarning maydonda o‘zlarini ayamay harakat qilishi deyarli aql bovar qilmas holat. Ularning qat’iyati, albatta, tahsinga sazovor. Ammo sport sifatini oshirish uchun bu muammoni hal qilish kerak», — deya Oyosning so‘zlarini keltiradi ESPN.

«Inter Mayami» MLS Sharqiy konferensiyasi turnir jadvalida 19 o‘yindan keyin 38 ochko bilan 2-o‘rinni egallab turibdi. Jamoa peshqadam «Neshvill»dan 5 ochkoga ortda qolmoqda.