«Xetafe» bosh murabbiyi Xose Bordalas «Alaves»ga qarshi o‘yinda hakam Manuel Xesus Oreyanani haqorat qilganiga qaramay, intizomiy jazoga tortilmaydi.
La Liganing yangi mavsumi 1-turidan o‘rin olgan uchrashuv «Alaves»ning 3:0 hisobidagi g‘alabasi bilan yakunlangan.
Birinchi bo‘lim oxirida «Xetafe» bir kishi kam bo‘lib qolgach, Bordalas hakam qarorlariga keskin norozilik bildirgan. Mundo Deportivo ma’lumotiga ko‘ra, kameralar murabbiyning Oreyanani «qo‘rqoq» deb atagani va unga nisbatan odobsiz ishora ko‘rsatganini qayd etgan. Shundan so‘ng Bordalas ogohlantirilgan.
Ispaniya hakamlar uyushmasi ushbu epizodni ko‘rib chiqdi, ammo yakunda yuqori turuvchi instansiyalarga rasmiy shikoyat kiritmaslikka qaror qildi.
Shu tariqa, Bordalas 2 tadan 4 tagacha o‘yinga diskvalifikasiya qilinishi mumkin bo‘lgan jazodan qutulib qoldi.
