Londonning "Arsenal" klubi o‘ng qanot himoyachisi Ben Uaytni jamoada saqlab qolmoqchi. Murabbiy Mikel Arteta angliyalik futbolchiga asosiy tarkibdan doimiy o‘rin kafolatlay olmayotgani aytilmoqda. Shu bois ommaviy axborot vositalarida Uaytning klubdan ketishi mumkinligi haqida turli xabarlar tarqalgan.

Biroq TEAMtalk ma’lumotiga ko‘ra, "kanonirlar" boshqa klublarning qiziqishiga qaramay, bu yozda Uaytni sotmaslikka qaror qilgan. 28 yoshli futbolchini qo‘lga kiritish uchun asosiy da’vogar "Everton" edi.

Transfermarkt portali ekspertlari Ben Uaytning transfer qiymatini 30 million yevro deb baholamoqda. Uning "Arsenal" bilan amaldagi shartnomasi 2028 yilga qadar mo‘ljallangan bo‘lib, unda kelishuvni yana bir yilga avtomatik ravishda uzaytirish imkoniyati ham mavjud.

Qayd etish joizki, so‘nggi xabarlarga ko‘ra, "Arsenal" Uaytni jamoada olib qolish pozisiyasida turibdi. Jamoa Ezri Konsa transferi bo‘yicha "Aston Villa" bilan muzokaralarni jadallashtirgan.