"Barselona"ning 22 yoshli yarim himoyachisi Mark Kasadoga Saudiya Arabistonining ikki klubi qiziqish bildirmoqda. Bu haqda jurnalist Ekrem Konur xabar berdi.

Manba ma’lumotiga ko‘ra, ispaniyalik futbolchini "Al-Hilol" va "Al-Ahli" o‘z safiga qo‘shib olishni istamoqda. Ta’kidlanishicha, har ikki klub Kasado uchun 40 million yevrogacha to‘lashga tayyor.

Biroq futbolchining o‘zi qaror qabul qilishga shoshilmayapti va unga kelib tushadigan barcha takliflarni batafsil o‘rganib chiqmoqchi.

Kasado o‘tgan mavsum barcha musobaqalar doirasida 34 ta uchrashuvda maydonga tushib, bitta golli uzatmani amalga oshirdi.

Yarim himoyachining "Barselona" bilan amaldagi shartnomasi 2028 yilga qadar mo‘ljallangan. Transfermarkt mutaxassislari uning bozor qiymatini 18 million yevroga baholamoqda.