"Yuventus" himoyachisi Federiko Gatti chorshanba kuni ehtiyot chorasi sifatida jamoa bilan mashg‘ulot o‘tkazmadi. 28 yoshli futbolchi muxlis bilan to‘qnashuv oqibatida yengil jarohat olgan.
"Yuventus" mavsumoldi tayyorgarligini klubning yoshlar jamoasiga qarshi o‘yin bilan yakunladi. An’anaga ko‘ra, bu uchrashuv to‘liq 90 daqiqa davom etmaydi — muxlislar maydonga tushishi sabab o‘yin oldinroq to‘xtatiladi. Odatda uchrashuv 60–70 daqiqa davom etadi, ammo bu safar muxlislar tanaffusdan so‘ng maydonga chiqishgan.
Ijtimoiy tarmoqlarda tarqalgan videoda muxlislardan biri yugurib kelayotib sirpanib ketgan va beixtiyor Gattining oyog‘iga tegib, uni yiqitib yuborgan. Himoyachi boshqa tomonga qarab turgani uchun to‘qnashuvdan qochishga ulgurmagan.
Football Italia ma’lumotiga ko‘ra, Gattining jarohati jiddiy emas va u mavsum boshiga tayyor bo‘lishi kutilmoqda.
