«Barselona» hujum chizig‘ini kuchaytirish uchun yana «Inter» sardori Lautaro Martines nomzodini ko‘rib chiqmoqda.

La Gazzetta dello Sport xabariga ko‘ra, kataloniyaliklar Xulian Alvaresni qo‘lga kiritishda jiddiy qiyinchiliklarga duch kelgach, argentinalik hujumchini transfer rejasiga qaytargan. Ayni paytda Lautaro «Barselona» uchun markaziy hujumchi pozisiyasini kuchaytirish variantlaridan biri sifatida qaralmoqda.

Biroq Milanda bu borada vaziyat boshqacha. Manba ma’lumotiga ko‘ra, «Inter» hozirga qadar «Barselona»dan Lautaro bo‘yicha rasmiy taklif olmagan. Italiya klubining pozisiyasi ham qat’iy — jamoa sardori sotilmaydigan futbolchi hisoblanadi va klub har qanday miqdordagi taklifni rad etish niyatida.

Lautaroning «Inter»dagi mavqei ham ehtimoliy transferni yanada murakkablashtiradi. 28 yoshli futbolchi nafaqat jamoa sardori, balki hujum chizig‘ining asosiy figuralaridan biri hisoblanadi. U 2018 yildan buyon Milan klubi sharafini himoya qilib kelmoqda. Argentinalikning amaldagi shartnomasi 2029 yil 30 iyunga qadar mo‘ljallangan.

Qolaversa, Martinesning o‘zi ham yaqinda «Inter»da qolish istagini bildirgan. U may oyida La Gazzetta dello Sport nashriga bergan intervyusida oilasi Milanda baxtli ekanini va klub uning ketishini istamasa, «Inter»da qolishini aytgan edi.

Shu sababli «Barselona» uchun bu transferni amalga oshirish oson bo‘lmaydi. «Inter»ning futbolchini sotishni istamayotgani, Lautaroning uzoq muddatli shartnomasi va operasiyaning katta mablag‘ talab qilishi kataloniyaliklar oldidagi asosiy to‘siqlar bo‘lib turibdi.

Hozircha tomonlar o‘rtasida rasmiy muzokaralar boshlangani haqida ishonchli ma’lumot yo‘q. Shu bois Lautaroning «Barselona»ga o‘tishi hozircha transfer bozoridagi ehtimoliy ssenariylardan biri bo‘lib qolmoqda.